A Policía Local de Vigo detivo a un veciño da cidade, S.M.C., de 42 anos, sobre o que pesaba unha requisitoria xudicial de procura, captura, detención e personación emitida polo xulgado de instrución 6 da cidade. Segundo informaron fontes policiais, os feitos ocorreron na madrugada deste xoves, cando unha dotación acudiu a un patio interior da rúa Barcelona, ante as queixas dos veciños pola presenza dun grupo dunhas 15 persoas que estaban a falar en voz alta e con cans que ladraban.

Cando se presentaron os axentes na zona, observaron que unha parella, cun dos cans, abandonaba o lugar polo punto de acceso contrario a ese patio, e a pesar dos requirimentos para que se detivesen e se identificasen, ambos fixeron caso omiso. Por iso, as policías da dotación saíron na súa procura co vehículo do 092, localizándoos pouco despois na Avenida de Hispanidade. Ao ser interceptados, o home negouse a dar a súa identificación, polo que as axentes solicitaron reforzo dunha dotación con axentes masculinos, para realizarlle un cacheo.

Ante isto, e coa certeza de que durante ese proceso íanlle atopar o DNI, o home mostroullo ás funcionarias, que ao cotexar os datos comprobaron que tiña pendente esa orde xudicial. Cando lle informaron de que ía ser detido, o home reaccionou de forma violenta, tratando de fuxir e embestindo a un dos axentes actuantes. Cando os demais policías trataron de reducilo, respondeu lanzando golpes e patadas, unha das cales alcanzou a outro polícia. Finalmente, a pesar dos golpes, insultos e ameazas, puido ser aplacado e engrilletado, para proceder á súa detención, seguindo o mandato xudicial.