Axentes da Policía Local de Vigo detiveron nas últimas horas a un cidadán de Perú, K.B.C.C., de 34 anos de idade, a quen lle figuraba en vigor unha orde de procura, detención e extradición, emitida pola División de Cooperación Internacional da Policía, a requirimento da Interpol. Segundo informaron fontes policiais, os feitos ocorreron na madrugada deste mércores, cando unha dotación se atopaba no Camiño Cotarelo en Coruxo e observou a un individuo que, ao decatarse da presenza policial, tratou de ocultarse. Os axentes procederon a identificalo ante esta actitude sospeitosa e comprobaron que lle figuraba en vigor esa orde de procura e detención, polo que procederon ao seu arresto e posta a disposición da autoridade competente.

Por outra banda, na madrugada do martes, a Policía Local detivo a outro home, M.J.P.F.L., de 28 anos e tamén de nacionalidade peruana, que foi localizado na Praza de Fernando o Católico. Ao ser coñecido por outras intervencións, os axentes pedíronlle a súa documentación e, ao cotexar os datos, pescudaron que pesa sobre el unha orde de afastamento emitida polo xulgado do Penal 2 de Vigo, con respecto a unha muller. Os policías comprobaron que o home estaba a menos de 500 metros do domicilio da vítima, polo que procederon á súa detención, por un suposto quebrantamento de condena. Por outra banda, tamén ratificaron que lle constaba unha requisitoria xudicial de investigación de domicilio e paradoiro, nese caso emitida polo xulgado de instrución 3 de Vigo.