Unha saída de vía dun camión nun dos accesos a Vigo desde a AP-9 está a provocar retencións na autoestrada en sentido entrada da cidade, á altura do barrio de Teis, segundo confirmaron fontes do 112 Galicia e da DGT. Segundo informaron fontes dos servizos de Emerxencias, a primeira alerta recibiuse sobre as 17.00 horas, e foron varios os particulares que informaron ao 112 de que un camión que transporta un colector saíuse da vía na AP-9, punto quilométrico 4, moi preto da entrada a Vigo pola rúa Isaac Peral.

O vehículo impactou contra a mediana e causou danos tamén nun muro, e as testemuñas alertaron de que o condutor podería estar ferido. O incidente está a provocar retencións nese acceso á cidade. O 112 Galicia deu aviso a Urxencias Sanitarias 061, á Garda Civil de Tráfico, a Policía Local, Bombeiros e Protección Civil. Igualmente foron avisados os servizos de mantemento da vía, xa que a calzada tiña restos do camión accidentado, do muro e de líquidos.