Un condutor de 51 anos de idade aceptou dous anos e un mes de prisión por atropelar a outro home en Vigo e deixalo en estado vexetativo mentres circulaba sen carné (por perder todos os puntos) e tras consumir drogas.

A vista de conformidade levouse a cabo na mañá deste xoves no Xulgado do Penal número 3 da cidade olívica e, durante a mesma, o procesado aceptou unha pena de dous anos e un mes por un delito de condución baixo a influencia das drogas en concurso cun delito de lesións imprudentes.

Ademais, tamén se lle impuxo a prohibición de conducir durante catro anos, supondo a perda definitiva da licenza. Polo delito contra a seguridade viaria por circular sen carné, o home aceptou 50 xornadas de traballo en beneficio da comunidade.

FEITOS

Os feitos ocorreron na tarde do 8 de febreiro de 2022, na Avenida de Ramón Nieto de Vigo. O condutor circulaba a case 80 quilómetros por hora nunha zona limitada a 40 km/h e, á altura dun paso de peóns, levou por diante a un peón que cruzaba a calzada nese momento e que non puido evitar o atropelo.

Como consecuencia do impacto, o corpo da vítima, un home de 41 anos nese momento, saíu disparado a uns 36 metros. O condutor deu positivo na proba de drogas para cocaína, anfetaminas, morfina, codeína e THC; ademais, a Policía Local, que interveu tras o accidente, comprobou que condutor non tiña en vigor o carné, por perda de puntos.