A comisión de festas da parroquia viguesa de Matamá, onde a pasada fin de semana un mozo perdeu a vida tras producirse un accidente no Saltamontes, asegura que a documentación que dependía deles estaba en orde: “Pechar atraccións non é competencia nosa”. Así o sinalou o seu presidente, Cristian González, quen subliñou que xa a finais de xuño eles pediron os permisos necesarios para realizar a festa, que lle foron concedidos. Estes son, a ocupación temporal do viario público e a declaración responsable.
Pola súa banda, segundo indicou en declaracións a Europa Press, cada aparello ten que enviar o seu propio papelorio, entre o cal se atopa o proxecto da atracción, o seu manual de funcionamento e o seu libro de operacións. A finais de xullo, o Concello informou á comisión de que o Saltamontes non enviara toda a documentación. Así, a organización deu traslado aos donos da devandita atracción, que tamén foran alertados polo goberno local.
“O xoves 1 chega ás 22.00 horas outro aviso de que a documentación está incompleta e volvemos dicirllo ao Saltamontes, quen nos di que llo transmitirá á súa xestoría para que envíe o documento”, engadiu González. “A partir de aí, nós non temos máis notificacións. A nosa preocupación é ter o permiso da festa e conseguímolo para poder facela. Pechar atraccións non é competencia nosa”, reivindicou o presidente da comisión, quen dixo que ese Saltamontes levaba varios anos acudindo ás festas de Matamá.
Cristian González volveu a trasladar unha mensaxe de ánimo á familia do falecido, Iván Castaño de 35 anos de idade. El mostrou a dor da comisión, que a “única ilusión que tiña era facer unhas grandes festas”. Visiblemente emocionado, González lamentou a traxedia e agradeceu o apoio recibido polos veciños nos últimos días, subliñando que a comisión está formada por nove mozos que sufriron na súa pel esta situación. “Esperamos que se esclareza o ocorrido para que non volva pasar”, sentenciou.
