Axentes da Policía Local de Vigo detiveron a un home de 51 anos de idade, J.M.F.M., como presunto autor do roubo dun vehículo e de dous delitos contra a seguridade viaria. Segundo informaron fontes policiais, os feitos ocorreron á primeira hora da mañá do domingo, cando o 092 recibiu un aviso para acudir á rúa Álvaro Cunqueiro, onde varias testemuñas alertaron da presenza dun condutor que parecía estar baixo os efectos do alcol ou as drogas.

Coa descrición do home, a Policía despregou un dispositivo de procura e localizou o vehículo do sospeitoso, mal estacionado, na rúa Tomás Alonso. O condutor atopábase nas proximidades e, aínda que inicialmente negou ter ido ao volante dese turismo, os axentes atoparon no seu peto as chaves do mesmo, e no interior localizaron o seu teléfono móbil.

Ao realizar as xestións oportunas, a Policía confirmou que o coche figuraba como roubado o pasado 23 de maio, polo que procederon á detención do home. Ademais, realizáronlle a proba de drogas, que deu positivo para cocaína e cannabis, e tamén comprobaron que o seu permiso de conducir non está en vigor. Por todo iso foi denunciado polo roubo e por dous delitos contra seguridade viaria. Igualmente, tramitouse denuncia administrativa polo incorrecto estacionamento do vehículo.