Dúas persoas resultaron feridas este domingo ao precipitarse co seu vehículo desde a muralla do Parador de Baiona e unha delas necesitou ser trasladada polos servizos sanitarios.

Pouco despois das 16,00 horas, unha traballadora do complexo hoteleiro e varios particulares, así como o Servizo de Urxencias Sanitarias de Galicia-061, deron aviso ao 112 deste suceso. Indicaban que un coche caeu da muralla do Parador, na rúa Arquitecto Jesús Valverde, á altura do número 3. Na súa comunicación, os alertantes descoñecían os detalles do accidente.

Ao ter coñecemento dos feitos, os operadores do 112 informaron os Bombeiros de Baixo Miño e de Vigo, ao GES de Val Miñor, á Garda Civil e á Policía Local. Xa no lugar, os membros do GES confirmaron que non era necesario excarcerar a ningún dos dous ocupantes, que saíran do vehículo polos seus propios medios.

Pola súa banda, os servizos sanitarios atenderon ás dúas persoas no mesmo lugar dos feitos e trasladaron a unha delas ao centro sanitario de referencia.