Un choque entre tres vehículos en Redondela deixa dúas persoas feridas. Sucedeu na parroquia de Chapela, ao fío das 17:30 horas, e foron os axentes da Policía Local os que chamaron ao 112 Galicia para dar conta dos feitos.

Durante a súa comunicación coa central de emerxencias galega, indicaron que era necesaria a colaboración do equipo médico de urxencia para atender aos posibles feridos.

Ata o lugar, na Avenida de Redondela, acudiron enseguida os profesionais sanitarios tras recibir o aviso por parte do 112.

Ademais, para colaborar no restablecemento das condicións de seguridade da vía, interviñeron os axentes da Garda Civil de Tráfico e o persoal do centro de xestión de tráfico.

Finalmente, un dos feridos foi trasladado en ambulancia e o outro foi evacuado por particulares ao centro hospitalario de referencia.