A concelleira de Seguridade de Vigo, Patricia Rodríguez, informou na mañá deste xoves da contorna dun centenar de incidencias na cidade olívica entre a xornada do 1 de novembro e a madrugada do día 2, sen que ningunha causase danos persoais.

A maioría consistiron en contedores desprazados, fallos na iluminación pública, tapas de sumidoiro levantadas, así como ramas e árbores caídas. Tamén se rexistrou un muro derrubado no CEIP para Dobrada e outro na rúa Llorente. Así mesmo, na tarde deste xoves, o Concello de Vigo informaba do cesamento de actividade das piscinas e o ximnasio do Carmen ata que a cuberta, que se viu afectada polo temporal, non quede asegurada. Por isto mesmo, están pechadas ao tráfico a rúa do Carme e o primeiro tramo de Cesáreo González.

O Consistorio tamén manterá pechadas ata que finalice a alerta meteorolóxica as pistas de tenis de Samil e aprazou as visitas teatralizadas ao cemiterio de Pereiró, que estaban programadas para este venres, así como o roteiro do programa ‘Camiño a Camiño’ prevista para o domingo.