Efectivos policiais da Udyco descargaron, no peirao transversal do Porto de Vigo, varias decenas de fardos de cocaína que transportaba o pesqueiro interceptado nas últimas horas fronte ás Rías Baixas. Os axentes procederon á descarga da droga (uns 2.000 quilos de cocaína, segundo a primeira estimación dos investigadores) e, segundo apuntaron algunhas fontes, é posible que o pesqueiro sexa trasladado en próximas horas a outro peirao.
Trátase dun buque de pequenas dimensións, algo máis de 12 metros de eslora, de nome ‘Bestarruza’, recentemente censado no rexistro xeral da frota pesqueira do Ministerio de Agricultura, Pesca e Alimentación. O barco está inscrito na modalidade de artes menores de pesca no Cantábrico noroccidental e ten o seu porto base en Ferrol.
O pesqueiro foi interceptado nas últimas horas pola Policía, que procedeu á detención dos seus catro tripulantes, e ao seu traslado á Comisaría de Vigo. Con todo, non se descartan novos arrestos en terra. Polo momento, non transcenderon máis detalles deste operativo, impulsado desde a Fiscalía Especial Antidroga e o xulgado de garda da Audiencia Nacional.
