Dous tripulantes dunha embarcación que quedou á deriva na tarde deste pasado domingo foron rescatados polo helicóptero Pesca 1 do Servizo de Gardacostas de Galicia na localidade pontevedresa de Bueu.

Tal como informou o 112 Galicia, os feitos ocorreron pasadas as 21,30 horas, cando un particular alertou de que unha embarcación neumática estaba á deriva e achegábase a unha zona de rocas de Bueu.

Por iso, deuse aviso a Salvamento Marítimo e a Gardacostas, que desprazou a aeronave e un barco á zona. “Afortunadamente, todo quedou nun susto. Os dous tripulantes resultaron ilesos sen que fóra precisa a asistencia sanitaria”, explicou o 112 Galicia, explicando que as dúas persoas foron trasladadas ao Aeroporto de Peinador.