Catro persoas resultaron feridas leves na mañá deste luns despois de producirse un accidente múltiple na AP-9 ao seu paso por Vigo. Tal como informou o 112 Galicia, os feitos producíronse pouco despois das 07,40 horas e foi un particular o que alertou dunha colisión por alcance no punto quilométrico 152 da AP-9, en sentido Tui ao seu paso polo barrio vigués de Teis.

Segundo explicaba na chamada, catro coches víronse implicados e as persoas feridas estaban a saír sen complicacións dos vehículos.

Por iso, solicitouse a intervención dos servizos sanitarios de urxencias, da Garda Civil de Tráfico, da Policía Local de Redondela e de Vigo, dos servizos de mantemento da estrada e dos bombeiros e Protección Civil de Vigo, que non se chegaron a desprazar ao momento.

Finalmente, catro persoas foron evacuadas en ambulancia a un centro hospitalario tras presentar lesións leves. O incidente provocou longas retencións na zona.