Polo menos unha persoa resultou ferida nunha nova colisión ocorrida na tarde deste mércores entre dous coches e un camión na AP-9 preto do túnel da Madroa. Tal como indicaron fontes do 112 Galicia a Europa Press, os feitos sucederon sobre as 15,30 horas no punto quilométrico 151 desa vía, dirección Pontevedra, á altura da parroquia redondelana de Chapela, tras pasar os túneles da Madroa.

Foi un particular o que alertou de que os tres vehículos chocaran, aínda que todos os seus ocupantes estaban fóra dos automóbiles, liberados e accesibles. Ademais, outro informante engadiu que un dos condutores presentaba dores de cabeza tras o choque.

Por todo iso, deuse aviso aos servizos sanitarios, á Garda Civil de Tráfico, á Policía Local, a Protección Civil, ao Servizo de Mantemento da vía e ao GES de Mos. Tamén se informou aos bombeiros de Vigo e O Morrazo. O incidente provocou retencións na estrada, xa que os vehículos implicados obstaculizaban a normal circulación.