O parque da Pesqueira do municipio pontevedrés de Mos converteuse na primeiro da área de Vigo que se suma á rede de parques sen fume, iniciativa posta en marcha pola Consellería de Sanidade para combater o tabaquismo.
A adhesión deste espazo á rede autonómica escenificouse este sábado cun acto no que participaron o conselleiro de Sanidade, Julio García Comesaña, e a alcaldesa de Mos, Nidia Arévalo.
A rede de parques sen fume de Galicia foi creada a finais do mes de novembro polo Executivo autonómico como medida encamiñada a reducir o consumo de tabaco na poboación, como lembrou a Xunta nun comunicado.
En total son xa 18 os municipios unidos a esta proposta, dos cales, cinco están na provincia de Pontevedra –Mos, A Estrada, Agolada, Moraña e Ribadumia–. Esta rede toma como espello as praias sen fume, xurdida en 2016 e da que forman parte 214 praias repartidas por 80 concellos de toda a comunidade.
En palabras do conselleiro de Sanidade, ambas as iniciativas “teñen un fin educativo e de sensibilización social, destacando a importancia da conduta da poboación adulta, para que sirva de modelo para os máis novos”.
