A Autoridade Portuaria de Vigo interporá recurso de apelación ante a Audiencia Provincial de Pontevedra tras coñecerse o auto ditado polo Xulgado de Instrución número 3 da cidade olívica no que se acordou o sobresemento da causa penal do accidente do Marisquiño 2018.
Nun comunicado, o Porto considerou que a decisión da maxistrada contradí as decisións xudiciais do Tribunal Superior de Xustiza de Galicia (TSXG), declaradas firmes polo Tribunal Supremo, e que conclúen que a responsabilidade do mantemento deste espazo correspondía ao Concello de Vigo.
Neste contexto, a institución presidida por Jesús Vázquez Almuiña lembra que o informe da Fiscalía, de data 20 de decembro, emitiuse 6 días despois de que o Tribunal Supremo inadmitise os recursos presentados polo Concello contra as sentenzas do TSXG e ratificase que incumpriu o mantemento da zona que se afundiu.
“De acordo con senllas sentenzas do TSXG, o deber de mantemento da infraestrutura colapsada correspondía en exclusiva ao Concello de Vigo, que o incumpriu por completo e, en concreto, respecto da plataforma que colapsou e, a pesar de tal incumprimento, que causou a súa grave degradación, permitiu o acceso masivo de público a unha plataforma que, de acordo coa sentenza, ‘sería válida para o uso ao que se destinaba, pero non para un uso máis intenso, como posteriormente demostrouse”, reivindicou o Porto.
Así, incide, ademais, que os fallos do TSXG gañaron firmeza tras a inadmisión a trámite dos recursos de casación interpostos polo Concello.
Por este motivo, o organismo portuario considera que a decisión de sobresemento non só ignora, senón que contradí as sentenzas do TSXG referendadas polo TS, “que adquiriron forza de cousa xulgada”.
Para o Porto, a neglixencia determinante de responsabilidade penal radica, ante todo, no feito de autorizar a celebración dun concerto sen coñecer o estado da infraestrutura na que se ía a celebrar.
“O Porto de Vigo considera que os afectados polo accidente teñen dereito a escoitar aos responsables municipais que autorizaron o evento e que non declararon antes de que se arquive a causa”, reivindicou a Autoridade Portuaria.
“Por último, o Porto de Vigo apunta que a decisión xudicial cualifica os feitos acontecidos desde a perspectiva da súa posible tipificación como un delito de lesións por imprudencia cando, ademais, estes son constitutivos dun delito agravado de danos“, engadiu o Porto.
