O pleno do Concello de Mos aprobou este mércores por unanimidade unha moción, presentada polo equipo de goberno (PP), dirixida ao Ministerio de Transportes para esixirlle o “óptimo” mantemento da A-55 para garantir a súa seguridade e a gratuidade da peaxe da AP-9 do Porriño.
“A autovía A-55 Vigo-O Porriño é a vía máis perigosa de Galicia e a autovía con máis accidentes de España. Está nun estado deplorable, co firme da estrada totalmente esnaquizado en todo o viario en xeral e ao seu paso por Mos en particular, onde unha gran fochanca leva pondo en perigo desde hai semanas aos 60.000 condutores que utilizan cada día a autovía”, lamentou a alcaldesa Nidia Arévalo.
Ela lembrou que esta vía é das máis perigosas e con maior sinistralidade de España, ademais dunha das máis lucrativas en relación á imposición de multas.
“Un total de 57.180 multas anuais que só recadando unha sanción mínima de 50 euros por cada unha suman case tres millóns de euros que, como mínimo, deberían ser reinvestidos nun óptimo mantemento do firme”, lamentou Arévalo.
A moción inclúe varios acordos nos que se insta ao Goberno a establecer a gratuidade da peaxe do Porriño da AP-9 como a solución “máis rápida e inmediata” para reducir a sinistralidade.
