O Arcebispado de Santiago saíu ao paso do conflito entre os fregueses de Cangas e o párroco Severo Lobato despois de que a casa reitoral da localidade fose apedrada durante a madrugada do venres.
Nun comunicado, a Arquidiocese compostelá, á que pertence a parroquia da comarca do Morrazo, sinala que abordou co sacerdote a situación para tratar de “suavizar as tensións e posibles malentendidos” na parroquia, onde os fregueses manifestaron en varias ocasións o seu malestar coa actitude de Severo Lobato.
“Baixo ningún concepto é aceptable xustificar calquera tipo de conduta agresiva ante a disensión de opinións ou pareceres, e condenamos rotundamente os comportamentos violentos acaecidos nas últimas horas contra o párroco, e as accións perpetradas contra os bens patrimoniais“, remarca o Arcebispado que encabeza Julián Barrio.
A última das polémicas reside na atribución por parte dos asistentes a unha misa dunhas palabras do párroco sobre as mortes de mariñeiros en naufraxios que, segundo estas versións negadas por Severo Lobato, atribuíu á súa falta de fe cristiá.
Neste sentido, a igrexa compostelá remarca que “sempre foi empática e próxima” coa vida das xentes do mar. “Os bispos e sacerdotes mostraron sempre unha especial sensibilidade cando se producen feitos dramáticos: perdas persoais, traxedias marítimas ou dificultades pola crise no sector“, engade o arcebispado.
Así as cousas, expresa o seu malestar por que “as palabras dunha predicación, que trataba de trasladar alento e consolo aos que dedican ou perden a súa vida no mar fosen terxiversadas, xerando así crispación entre os fieis”.
Por último, reitera a súa chamada á “convivencia pacífica” e anima á comunidade parroquial canguesa “a dar un paso adiante en aras de restablecer a normalidade desde un diálogo construtivo, e nunca desde o reproche, a calumnia, as descualificacións e calquera outra actitude ou atitude violenta”.
