Dous axentes da Policía Local do Porriño salvaron a vida dun veciño de 80 anos que sufriu unha parada cardiorrespiratoria na tarde do pasado martes.
Segundo informa o Concello do Porriño nun comunicado, o suceso tivo lugar na céntrica rúa Ramirás. O home circulaba no seu vehículo e foi un viandante o que alertou á Policía de que había unha persoa inconsciente no interior dun coche parado no medio da calzada.
A patrulla desprazouse ata o lugar, onde chegou en dous minutos. Alí, comprobaron que non respondía aos estímulos polo que procederon a realizar manobras de reanimación cardiopulmonar, co uso do equipo desfibrilador do coche patrulla ata que se estabilizou e foi atendido polos servizos médicos.
O alcalde do Porriño, Alejandro Lorenzo, recibiu este mércores aos dous axentes para agradecer o seu traballo.
