Procuradores de Vigo trasladaron o seu rexeitamento “total” ao Real Decreto de Aranceis aprobado polo Goberno e estudan recorrelo, ademais de pedir a dimisión de toda a directiva do Colexio Xeral de Procuradores de España (CGPE) pola forma en que xestionou a tramitación desta norma que reduce “drasticamente” os honorarios deste colectivo e “compromete o futuro” da profesión.
O Colexio de Procuradores de Vigo solicitara ao presidente do CGPE, Juan Carlos Estévez, que acudise á cidade a explicar os pormenores do Real Decreto e a dar contas da súa xestión ante a “indefensión” destes profesionais derivada da nova norma. Estévez rexeitou a invitación e suspendeu unha visita prevista para o 2 de xuño, alegando que “carecería de contido”.
Os procuradores de Vigo decidiron, nunha asemblea extraordinaria, asinar masivamente cartas pedindo a dimisión de Estévez e o seu equipo directivo (recolleron 115 firmas), e estudar a posibilidade de recorrer o Real Decreto ante o Tribunal Supremo, do mesmo xeito que fan outros Colexios.
O texto aprobado establece límites máximos nos aranceis nos que se basean os honorarios profesionais dos procuradores e non permite fixar un límite mínimo. Estes honorarios permanecen conxelados desde 2003 e non se actualizaron, “mentres que a inflación subiu un 44,5%”, polo que os procuradores vigueses consideran “inasumible” introducir agora modificacións á baixa sen aplicar previamente, “como mínimo”, unha actualización baseada no IPC oficial.
O decano do Colexio de Procuradores de Vigo, José Antonio Fandiño, sinalou que o Real Decreto “comporta unha desconsideración absoluta cara á actividade dos procuradores” e condénalles “” a cobrar polos seus servizos unhas cantidades que “non se adecúan á realidade”.
