Baixo o nome ‘Los Escudos está de boda’, a cidade olívica acolle o primeiro evento de vodas do 2022, organizado un ano máis polo Hotel Pazo Los Escudos. Neste evento mostraranse as últimas tendencias en maquillaxe e peiteado de noiva, tocados, arranxos florais, fotografía e wedding planner, entre outros.

O prato forte protagonizarao un desfile nupcial a cargo de Salón YÖY, onde modelos e influencers locais lucirán vestidos, maquillaxes e peiteados inspiradores.

O evento celebrarase os días 29 e 30 de abril no Hotel Pazo de Los Escudos, situado na avenida Atlántida. Estará amenizado por música en directo, catering e un brinde final para dar a benvida a un período de vodas e celebracións que se prevé “intenso” tras as numerosas cancelacións e atrasos aos que obrigou a pandemia.

As persoas asistentes poderán recibir asesoramento gratuíto sobre maquillaxe e peiteado para voda. Ademais, no córner habilitado por Salón YÖY poderase seguir en directo o proceso de preparación das noivas, que desfilarán o sábado ás 18:00h polos xardíns do Pazo.