O Concello de Vigo en colaboración coa ONG Accem xa atende na cidade a máis de 30 refuxiados ucraínos que chegaron polos seus propios medios nos últimos días, segundo indicou o alcalde, Abel Caballero.

Son homes e mulleres que están a ser apoiados polo Concello e a ONG, tanto para o seu aloxamento como fornecendo información para conseguir o status de refuxiado. “Permanecemos atentos a todos os que vaian chegando”, reivindicou o rexedor.

Caballero explicou que a última hora do sábado chegaron á cidade en tren unhas vinte persoas, que pasaron a noite en Vigo, pero das cales 18 continuaron a súa viaxe ata Porto (Portugal) e dúas quedaron na urbe. O domingo chegaron outras tres mulleres que se estableceron con familiares e o luns outra familia asentouse na cidade.

O alcalde indicou que outras 25 persoas procedentes de Ucraína están tamén sendo atendidas polo Concello e a Accem, ONG que traballa para mellorar a calidade de vida dos refuxiados, migrantes e colectivos vulnerables. “En Vigo estamos preparados, temos nosa propia rede de emerxencia e estamos preparados para darlles acomodo”, reivindicou Caballero.