O BNG reclamou este martes, cunha concentración en Vigo, unha “rectificación” do goberno galego ante a “inaceptable” decisión de restrinxir a asistencia en 14 unidades de Atención Primaria da área de Vigo, e advertiu de que “non se pode aceptar como normal o que non é normal”.
Así o trasladou a deputada nacionalista Montse Prado que, xunto con outros deputados e varios alcaldes do BNG na comarca (os rexedores das Neves, Ponteareas, Tomiño e O Rosal), así como portavoces municipais, compareceu ante os medios durante unha concentración ante a delegación territorial da Xunta na cidade olívica.
Prado tachou de “inaceptable” a medida de restrinxir a actividade de 14 centros só ás consultas relacionadas co COVID e ás urxencias (aínda que o Sergas matizou que se tratou dunha suxestión ao persoal facultativo, non unha instrución obrigatoria, para axudar a xestionar a actividade ante a ‘explosión’ de contaxios), e advertiu de que “non é normal que os veciños reciban unha asistencia sanitaria propia dunha época de guerra, onde os profesionais teñen que escoller a quen atenden e a quen non”.
Tras lembrar que “hai outras patoloxías, como as crónicas, que non poden agardar”, Montse Prado denunciou que a decisión de Sanidade, que inicialmente está vixente ata o luns 10 de xaneiro, tomouse “sen falar con ninguén, nin cos representantes dos traballadores”, e o único que provoca é que se derive a asistencia á PAC ou aos servizos de Urxencias, “que tamén están ao límite”.
Para a deputada do BNG esta situación tamén é “inaceptable” porque “chove sobre mollado” e, de novo, a área sanitaria de Vigo, a que máis padece a “desatención e falta de recursos” por parte do Goberno galego, converteuse nun “banco de probas” dos “recortes do PP”.
ESTRATEXIA DE “RECORTES DO PP”
Prado sinalou que o estado da Atención Primaria en Galicia e en Vigo é “resultado de doce anos de recortes” e dunha estratexia do Goberno de Núñez Feijóo para “deteriorar a sanidade pública” e “engordar” o negocio da sanidade privada, á vez que lamentou que a Xunta non tomou ” nota” do ocorrido en pandemia, cando se demostrou a necesidade dun sistema forte e dimensionado.
A deputada subliñou que o BNG non aceptará esta situación e anunciou que “recrudecerá a súa ofensiva” en defensa da sanidade pública e, en concreto, da Atención Primaria, apoiando as mobilizacións sociais e dos profesionais, ademais de reforzando a súa acción parlamentaria. Respecto diso, lembrou que os nacionalistas reclaman a comparecencia do conselleiro de Sanidade, Julio García Comesaña, para “que explique que alternativa” dá aos veciños das zonas afectadas por eses recortes e restricións.
Finalmente, volveu incidir na necesidade de adoptar “medidas estruturais” para reforzar a sanidade, e criticou que o Goberno galego non só recortou o orzamento para a Atención Primaria, senón que tampouco adopta decisións que freen a marcha dos profesionais sanitarios (entre eles, os recentemente titulados). “Se cae a Atención Primaria, cae o sistema sanitario, porque a Primaria é a peza angular”, sentenciou Prado.
CRÍTICAS DO PSDEG
A medida de suxerir a restrición da actividade neses 14 centros de Primaria recibiu críticas tamén por parte doutras formacións políticas, como o PSdeG, que este venres volveu esixir explicacións ao goberno galego.
Así, a deputada Leticia Gallego instou ao Sergas a incorporar “de forma inmediata” a máis persoal sanitario nesas unidades de Atención Primaria, e subliñou que as restricións son un “ataque” contra a sanidade pública, universal e gratuíta, ao obstaculizar a asistencia en casos de enfermidades comúns e non urxentes.
Na mesma liña, o goberno municipal de Vigo, en palabras do seu portavoz Carlos López Font, denunciou que a Xunta non contratou a profesionais a pesar de recibir diñeiro para iso por parte do Goberno de España. “Xogan coa saúde”, denunciou, e esixiu ao conselleiro de Sanidade explicacións antes unha situación “intolerable”.
Do mesmo xeito, a presidenta da Deputación de Pontevedra e tenente de alcalde de Vigo, Carmela Silva, criticou tamén nas súas redes sociais que o Goberno galego “unicamente empregou 515 millóns de euros, dos 735 do fondo Covid que recibiu do Goberno do Estado”, mentres a Atención Primaria está “desbordada”. “Darán explicacións Feijóo e Rueda?225 millóns sen usar? É un disparate!”, cuestionou a socialista.
O secretario xeral de Podemos Galicia, Antón Gómez-Reino, tamén se referiu ao “desastre” na sanidade pública galega pola “sobrecarga” nos centros de saúde, e apuntou que os problemas na área de Vigo son o “exemplo claro de que a Xunta non aprendeu nada ao longo da pandemia, e que a súa intención non é protexer a sanidade pública, senón desmantelala”.
Respecto diso, puntualizou que as medidas adoptadas, aínda que se presentaron como “temporais” por parte do Sergas, “forman parte dun sistema de recortes e abandono continuo aos servizos públicos“, e esixiu ao Goberno de Feijóo “que escoite ao persoal sanitario e poña todos os recursos” que necesitan.
“VOLTA Á NORMALIDADE”
Fontes sanitarias sinalaron que os centros de atención primaria da área de Vigo volverán “á normalidade” o próximo 10 de xaneiro, tendo en conta que se espera a reincorporación de persoal facultativo que estaba de baixa ou de vacacións.
En todo caso, o Sergas matizou que as medidas de atender só casos urxentes ou consultas relacionadas co COVID, desprogramar citas ou bloquear as axendas dos profesionais médicos en 14 unidades de Atención Primaria (medidas que moitos centros optaron por non aplicar), non eran unha instrución obrigatoria, senón unha suxestión ou ferramenta de xestión para axudar ao persoal ante o crecemento de contaxios nesta sexta onda da pandemia.
Así mesmo, a delegada da Xunta en Vigo, Marta Fernández-Tapias, defendeu a decisión do Goberno galego de facer unha serie de “recomendacións” aos centros que presentaban problemas por falta de persoal, e afeou ao goberno local da cidade que “utilice a pandemia e a Atención Primaria para atacar politicamente”.
Fernández-Tapias lembrou que, na área sanitaria de Vigo hai máis de 13.000 contaxiados por COVID, o que aumenta a presión sobre os centros de Atención Primaria, e repetiu o argumento do Goberno galego sobre a falta de profesionais para poder contratar. “O que debía facer López-Font é reclamar ao Goberno de España que nos deixen ter máis persoal, que nos dan máis prazas MIR, que é o problema que hai”, sentenciou.
