A AECT Río Minho creou un rexistro de persoas afectadas polo peche da fronteira entre o sur de Galicia e o norte de Portugal co obxectivo de explorar a tramitación de posibles indemnizacións.

Diso informa este martes a Deputación de Pontevedra, que sinala que nas primeiras horas da súa posta en marcha xa se recibiron unha ducia de reclamacións.

O formulario está colgado na páxina web ‘smartminho.eu‘ e permite que cada persoa achegar os seus datos e sinale o tipo de prexuízo sufrido polo peche da fontera, desde perdas de tempo a aumento de custos de viaxe ou redución da clientela do outra marxe.

“Sabemos que hai moitas persoas afectadas e ata o momento dirixíanse aos seus concellos, ás administracións máis próximas, para queixarse e saber como actuar”, explicou o deputado provincial e vicedirector da AECT, Uxío Benitez, que apuntou que o obxectivo é “centralizar” as queixas de cara a futuras reclamacións, pois entenden que o Miño “debe ser compensado economicamente pola decisión dos estados de pechar a fronteira e deixar só un paso”.

Así as cousas, os interesados deberán achegar os seus datos persoais, aclarar se son particulares, empresas ou autónomos, sinalar o sector no que traballan e o número de viaxes que deben realizar entre ambos os lados da fronteira, así como os quilómetros que percorren con ela aberta e pechada.

A iniciativa tamén pretende solicitar información sobre os prexuízos sufridos polos reclamantes, como a obrigatoriedade de percorrer máis distancia e pasar máis tempo na estrada polo peche da fronteira, o custo económico que isto supón ou a redución de clientes polo peche do paso.

Segundo un estudo elaborado polo profesro Xavier Cobas da Universidade de Vigo, o impacto económico do peche da fronteira cífrase en máis de 92 millóns en perdas nos sectores da hostalaría e o comercio durante o primeiro confinamento da primavera de 2020.