Dende Vigo a Castroverde, de Ares a Vilagarcía pasando por Vilaboa e Baiona, case cincocentos mozos e mozas de institutos de toda Galicia se lanzarán estes días a dar os seus primeiros pasos na radio. Farano como parte do proxecto de educación en valores “Activistas polo mundo queremos”, que neste 2021 incluirá a elaboración dun podcast para “combater o machismo, o consumismo e o racismo”.

A actividade radiofónica deste 2021 –que xa tivo lugar en edicións anteriores– chega logo de que a rapazada adscrita ao programa comprendera a importancia de ferramentas comunicativas como a radio á hora de impulsar accións de activismo. Precisamente, e segundo destacan os organizadores, esta concienciación chegou da man de diversas charlas virtuais mantidas con activistas dominicanas e salvadoreñas.

Así, unha vez aprendida a teoría, toca choutar á práctica. A rapazada implicada no programa leva semanas investigando sobre temas de denuncia e transformación social que, agora, poderá levar ao formato da radio para maior difusión. Entre eles destacan temas de actualidade os parques eólicos da serra da Grova e do Galiñeiro, o racismo nas aulas, entrevistarán a coñecidas escritoras feministas como Eli Ríos, etc.

Os talleres radiofónicos arrincarán así estes martes a mediodía no IES Primeiro de Marzo de Baiona, para logo chegar ao do IES Miguel Ángel González Estévez do Carril, en Vilagarcía de Arousa. Nas semanas vindeiras irán gravando o resto dos centros educativos que este ano participan no proxecto: o CPI As Mirandas en Ares (A Coruña), o CPI Plurilingüe de Castroverde (Lugo) o CPI do Toural de Vilaboa ( Pontevedra) e CPR Rosalía de Castro de Vigo.