O investigador Adriano Sánchez Lastra demostrou na súa tese de doutoramento que os exercicios con bandas elásticas son beneficiosos para a saúde física e cognitiva dos anciáns con problemas de mobilidade.
O xa doutor en Educación, Deporte e Saúde pola Universidade de Vigo centrou a súa tese de doutoramento en “analizar os efectos diferenciais” da inclusión en residencias de dous programas de exercicio de forza con bandas elásticas, un centrado nos músculos do tren superior e outro nos do tren inferior.
Paras isto, ao longo dun ano, contou coa participación de 68 residentes, dos que o 65% eran mulleres, de tres centros xeriátricos do grupo Domus Vi en Barreiro e Bembrive, en Vigo, e Cangas do Morrazo.
FALTA DE ACTIVIDADE FÍSICA
A falta de actividade física asóciase á aparición de diferentes enfermidades crónicas e constitúe un problema de saúde que se agrava naqueles sectores da poboación nos que a inactividade pode ser maior, como as e os residentes en centros da terceira idade.
De aí a importancia de promover a práctica de actividade física neste colectivo, incluíndo nesta, como recomenda a Organización Mundial da Saúde (OMS), o exercicio de forza, xa que diferentes estudos teñen constatado os seus beneficios, tanto físicos como cognitivos.
“Debido ao seu baixo custo e á súa adaptabilidade ao espazo dos centros xeriátricos, as bandas elásticas constitúen unha interesante ferramenta para levar a cabo este tipo de actividade con anciáns”, defende o investigador.
RECOMENDACIÓNS PARA OS CENTROS XERIÁTRICOS
Adriano Sánchez Lastra, tralos resultados da investigación defende que “o exercicio de forza ten beneficios na función cognitiva” e avoga porque se desenvolvan nos centros xeriáricos “sesións que incidan no exercicio de forza que combinen o tren superior e o inferior”.
Ademais, o autor subiña a importancia de que nas residencias se cumpran as “recomendacións mínimas de actividade física” da OMS para maiores de 65 anos, que comprenden “150 minutos semanais de actividade física aeróbica de intensidade moderada, como camiñar, ou 75 de vigorosa, como trotar, xunto coa realización de “actividades que melloren a forza muscular, en combinación con exercicios de equilibrio”.
“Sabemos que cumprir estas recomendacións non só favorece o mantemento da independencia funcional deste colectivo, senón que ademais reduce o risco de mortalidade prematura“, engade o investigador.
