O alcalde de Vigo, Abel Caballero, volveu a criticar este mércores a falta de apoio da Xunta á campaña do Nadal da cidade que, segundo aseverou, “move máis xente que o Camiño de Santiago”.

Nunha rolda de prensa, o rexedor olívico lamentou que “a Xunta só mira por Vigo para levar diñeiro“, ao fío dos pagos que fai a administración municipal e que son “competencia exclusiva” do goberno galego, como as escolas infantís ou os centros de día de titularidade autonómica.

“Paréceme moi ben que fagan publicidade do Xacobeo, non o critico pero, ven que fagan o mesmo do Nadal de Vigo? Sabían que move máis xente o Nadal de Vigo que o Camiño? Medido obxectivamente”, proclamou Caballero, en alusión aos datos da ruta xacobea e da campaña do Nadal do ano 2019.

Segundo o alcalde de Vigo, hai “miles de anuncios do Xacobeo” pero “nin un” para apoiar o Nadal da cidade. “Isto é un escándalo, porque os impostos os paga Vigo”, advertiu Caballero, quen sinalou que “é obrigado” que o goberno galego apoie a campaña do Nadal da cidade, á que “non lle dedican atención”.