A listaxe de municipios en alerta vermella pola incidencia da pandemia do coronavirus na última semana repuntou este luns a 38, catro máis que o domingo. Isto débese a que volveu a activarse o aviso máximo nas localidades coruñesas de Pontedeume e Ordes, e nas pontevedresas de Tui, Vilagarcía de Arousa e Nigrán, á vez que se desactivou en Chantada.
Segundo se reflicte no mapa ‘semáforo’ que actualiza diariamente a Consellería de Sanidade, a gran maioría de concellos en vermello –34 en total– están na Coruña e Pontevedra. E é que en Ourense tan só queda Xinzo de Limia, mentres que en Lugo continúa vixente na súa capital, en Sarria e en Vilalba.
En Pontevedra, repuntan este luns a 18 municipios no nivel máximo de alerta tras engadirse Tui, Vilagarcía e Nigrán. Aínda figuran nesta situación A Estrada, Lalín, Cambados, a cidade de Pontevedra, Poio, Sanxenxo, Marín, Redondela, Vigo, Mos, Moaña, Ponteareas, Salvaterra, Tomiño e O Porriño.
Tamén volven subir os concellos coruñeses en vermello a 16, ao sumarse Pontedeume e Ordes mentres se manteñen Ferrol, Narón, A Laracha, Arteixo, Culleredo, Cambre, Oleiros, Coristanco, Carballo, Malpica, Ribeira, Ponteceso, Cabana e Vimianzo.
A alerta máxima de risco de todas estas localidades implica que se detectaron máis de 21 casos de coronavirus no últimos sete días. Con todo, nas urbes de máis de 50.000 habitantes, o limiar para detectar o aviso vai en función do tamaño: Ferrol –máis de 76 casos nunha semana–, Pontevedra –máis de 96–, Lugo –máis de 112– e Vigo –máis de 332–.
ALERTA LARANXA
Pola súa banda, no segundo chanzo de alertas hai este luns un total de 17 localidades galegas. A provincia ourensá continúa con só dous –Ourense e Ribadavia– nesta situación e en Lugo mantéñense en tres tras a saída de Viveiro por mellorar os seus datos: Chantada, Guntín e Monforte.
A provincia da Coruña, pola súa banda, baixa a oito os municipios en laranxa. Continúan a cidade herculina, Santiago, Ames, Porto do Son e Boiro, aos que se engaden este luns Cerceda e Santa Comba. Pontevedra descende á metade os concellos na situación máxima pola pandemia. Se este domingo eran 10, este luns son cinco: Ribadumia, Meis, A Guarda, Cangas e O Grove.
