O alcalde de Vigo, Abel Caballero, denunciou este mércores a “insensibilidade” da Xunta de Galicia por decidir “unilateralmente” a retirada do Servizo de Axuda no Fogar (SAF) para 127 persoas maiores da cidade, que quedarán “abandonados” e “illados”, ao tratarse de xente vulnerable, que vive soa.

Nunha rolda de prensa, o rexedor olívico arremeteu contra o goberno galego por pedir a baixa deses usuarios, que se fará efectiva a partir do 30 de novembro. “É algo que me enerva e, ademais, no medio dunha crise sanitaria”, proclamou Caballero, quen lembrou que a Xunta recibiu “transferencias cuantiosas” do Goberno central para atender a este tipo de colectivos.

“A Xunta condena a estas persoas, a maioría mulleres, a quedar sen cobertura (de axuda social), e di que teñen que facer unha solicitude para estar no SAF, cando está a tardar dous anos en resolver esas solicitudes”, criticou.

Abel Caballero censurou o “enfoque profundamente antisocial” da Xunta nesta cuestión, porque “condena” a máis dun centenar de persoas maiores “a un destino inimaxinable”. “É intolerable”, resolveu.

SAF “EXTRAORDINARIO”

Pola súa banda, a delegada da Xunta na cidade, Marta Fernández-Tapias, saíu ao paso das acusacións do rexedor olívico precisando que esas atencións se corresponden cun Servizo de Axuda no Fogar “extraordinario”, que se puxo en marcha durante a pandemia polo peche dos centros de día, para substituír os seus servizos.

“Agora, tres meses despois de que os centros de día reabrisen, o SAF extraordinario xa cumpriu a súa función”, explicou, e lembrou que as persoas con dependencia “seguen contando co SAF normal”.

A ese respecto, a delegada da Xunta sinalou que, no que respecta ao SAF ordinario, o Concello de Vigo “ten sen executar 1.600 horas ao mes”.