O incendio provocado por un raio na Illa de Ons, integrada no Parque Nacional Marítimo Terrestre das Illas Atlánticas, continúa activo –aínda que evoluciona favorablemente– e arrasou, segundo as primeiras medicións provisionais, unhas 4 hectáreas de monte raso.
Os últimos datos comunicados pola Consellería de Medio Rural é que o incendio está activo desde pouco antes das 17,00 horas; e que se mobilizaron para a súa extinción dous axentes forestais, catro brigadas e unha motobomba.
A hipótese principal é que este lume foi causado por un raio, xa que as treboadas afectaron na tarde deste xoves a Galicia e, con especial intensidade na zona sur.
O alcalde de Bueu, Félix Juncal, trasladou a Europa Press que se lle notificou a mobilización de medios humanos e unha motobomba mediante barcos que saíron das localidades pontevedresas de Cangas, O Grove e Vilagarcía.
Os MEDIOS “TARDARON EN CHEGAR”
Entre tanto, os veciños que residen na illa axudaron con cubos e os medios dos que dispuñan na extinción do incendio. Segundo trasladou a Europa Press a portavoz da Asociación de Veciños e Amigos das Illas Ons, María José Pérez Piñeiro, os medios “tardaron en chegar”.
“Ninguén contaba coa treboada, pero pasara unha hora e estaban tres brigadistas”, lamentou, á vez que lembrou que durante o verán permaneceu un retén contra incendios de garda na illa, pero retirouse a semana pasada.
