Polo menos 22 escolas e un centenar de clases tiveron que pechar ata este venres, tan só tres días despois da ‘volta ao cole’ en Francia, debido á detección de casos de COVID-19, segundo desvelou o ministro de Educación, Jean-Michel Blanquer.
“Na metrópole hai doce centros pechados hoxe, na Reunión hai dez. En total, son 22”, indicou o ministro nunha entrevista a Europe 1, precisando que tamén hai “un centenar” de clases pechadas. Blanquer considerou que o dato é baixo tendo en cuonta que en Francia hai en total 60.000 centros educativos.
Segundo o ministro, “cada día actívanse 250 protocolos por casos sospeitosos”. Cando isto ocorre, o alumno ou o profesor “é illado inmediatamente” e pídeselle que queden na casa. A continuación, procédese a localizar os contactos e realízanse test, precisou.
“Máis de tres casos de COVID-19 desencadean xeralmente o peche da estrutura” aínda que “cada caso é particular”, incidiu Blanquer, que aclarou que a continuación propoñen de xeito inmediato o ensino a distancia.
Francia superou o xoves o limiar dos 300.000 casos de COVID-19, despois de rexistrar nas últimas 24 horas un nivel de contagios superior aos 7.100. Ademais, as autoridades francesas tamén rexistraron 21 falecidos máis, o que sitúa o total de vítimas mortais en 30.706 desde o inicio da pandemia. O Goberno impuxo como obrigatorio o uso de máscara para alumnos maiores de 11 anos e o persoal docente.
