O alcalde de Tui, Carlos Vázquez Padín, remitiu unha carta ao presidente do Goberno, Pedro Sánchez, para convidarlle a visitar a zona da parroquia de Paramos onde, o pasado 23 de maio, explotou o almacén ilegal de material pirotécnico, causando dous mortos e unha trintena de feridos.
Con esta invitación, o rexedor pretende que o titular do Executivo coñeza “de primeira man” a situación que se vive no municipio e poida “avaliar a absoluta necesidade” que Tui ten dun “forte compromiso económico e de colaboración” por parte da administración central.
Na súa carta, Vázquez Padín lembra os danos persoais causados pola traxedia, así como os danos en vivendas, vehículos e outras propiedades. Unha catástrofe de tal magnitude, incide, polo que “máis de 700 persoas víronse prexudicadas gravemente“, e que afectou a infraestruturas como camiños, abastecemento e saneamento, tendidos eléctricos e telefónicos, e outros servizos.
De feito, a corporación municipal tudense, por acordo plenario unánime do pasado 31 de maio, solicitou a declaración de zona gravemente afectada por unha emerxencia de protección civil.
