InicioSociedadeFamiliares de maiores denuncian a falta de médico de garda na residencia...

Familiares de maiores denuncian a falta de médico de garda na residencia de Aldán, con 102 positivos

"Como se deixa sen médico a toda esa xente que deu positivo e non se atopa ben?", pregúntase unha achegada dun usuario. Ao parecer, durante as tardes e as noites da fin de semana, os residentes só eran atendidos polo persoal do PAC. O "caos" na xestión e a "falta de transparencia" son as principais críticas cara a DomusVi de Cangas.

PUBLICADO O

Familiares de maiores da residencia DomusVi de Cangas, en Aldán, denuncian a ausencia de médico “durante a tarde e noite do sábado e a tarde e noite deste domingo” no centro, que concentra 102 casos positivos de coronavirus.

Así o trasladou a familiar dun home que vive nesa residencia, Amelia Pérez, en declaracións a Europa Press. Asegura que hai un “gran balbordo” entre os veciños do Morrazo que teñen a familiares vivindo nesta residencia pola “falta de información” e o “caos” de xestión.

Agora que este centro foi intervido pola Xunta, Amelia Pérez denunciou que durante este fin de semana ten constancia de que “non hai un médico de garda durante as tardes e as noites”. A súa irmá chamou á residencia para coñecer o estado do seu familiar e na mesma chamada preguntou pola presenza sanitaria. “Nós preguntamos e dixéronnos que non” ía haber médico “durante a tarde e noite do sábado” nin tampouco do domingo, sinalou.

Lembra que nas instalacións están activos 102 casos de coronavirus das 150 prazas existentes. Critica que “os avós” estean “desamparados” e pregúntase: “como se deixa sen médico a toda esa xente que deu positivo e non se atopa ben?”.

Fontes da Xunta de Galicia explicaron que “médicos do Sergas realizan un seguimento especial diario ás persoas confirmadas con COVID-19” e que “ante calquera urxencia tamén existe unha total coordinación cos servizos sanitarios de atención primaria e hospitalaria”.

Pola súa banda, Amelia Pérez precisou que esas “urxencias” que menciona a Administración autonómica son atendidas -ante a ausencia de médico de garda- polos “profesionais do Punto de Atención Continuada de Cangas, que se desprazan ata as instalacións de Aldán” se un paciente necesitase ser atendido cando o médico non está no centro, é dicir, durante as tardes e noites dos fins de semana.

“ABANDONADOS Á SÚA SORTE”

A familiar afectada cre que a distancia entre a PAC e a residencia é de “10 minutos” e que esa diferenza de tempo supón deixar aos máis maiores “abandonados á súa sorte”.

Relata que o seu familiar “deu negativo no primeiro test”, pero o domingo pola mañá estaba pendente do resultado da segunda proba. Critica que os familiares teñan noticias do que alí ocorre “pola prensa” e tamén a falta de “transparencia” na información que se achega, “mesmo agora que está intervida pola Xunta”.

Recoñece que é “complicado” xestionar esta situación, pero demanda información “para as familias, sexa boa ou mala” e que se proceda aos “traslados” dos pacientes que deron negativo nas PCR para evitar o contaxio.

“REFORZO” DE PERSOAL

Ante esta situación que retrata unha das familiares afectadas, a Administración autonómica asegura que a intervención na residencia de Aldán “está centrada no aspecto sanitario”.

Por ese motivo “o Sergas reforzou” o persoal “cunha coordinadora de enfermaría, 13 enfermeiras e 14 auxiliares”. Cinco delas entrarán mañá. Todas elas súmanse a dous médicos, tres enfermeiras e 36 auxiliares que xa traballaban nesta DomusVi Cangas.

Ao mesmo tempo, o Goberno galego sinalou que oito persoas deron negativo no segundo test realizado aos usuarios da residencia e que ao longo da mañá deste domingo “foron trasladadas á residencia de tempo libre de Panxón”; mentres que outras dúas “seguen pendentes de confirmar o seu negativo”.

SITUACIÓN DE RESIDENTES

Amelia Pérez explicaba que o seu familiar dera un resultado negativo na primeira PCR que se lle fixo, pero que “o seu compañeiro de habitación estaba diagnosticado con COVID-19” e “seguían xuntos”. Segundo explica, o médico aclarou que existían posibilidades de ser “un falso negativo” e que por iso tomaron a decisión de deixalo no mesmo cuarto.

Con todo, fontes da Xunta precisaron que “as persoas confirmadas” con coronavirus “están illadas tanto daquelas que teñen confirmado o seu negativo como das que aínda están pendentes”.

ÚLTIMAS

Asistidas un pai e a súa filla en Vigo tras producirse un incendio na súa vivenda

Dúas persoas, un pai e unha filla, necesitaron asistencia en Vigo este xoves tras producirse...

Emilio Sotelino ou a Asociación de Viúvas Demócratas entre os Vigueses Distinguidos 2024

O pleno de Vigo aprobou este luns por unanimidade nunha sesión extraordinaria os novos Vigueses...

O goberno de Vigo aproba o marco orzamentario ata 2027 e prevé investimentos por valor de 33 millóns cada ano

O alcalde de Vigo, Abel Caballero, anunciou que o goberno local aprobou o marco...

Pechados parques e espazos arbóreos da cidade de Vigo debido ao temporal

O Concello de Vigo restrinxiu por seguridade o acceso aos parques e espazos arbóreos...