Os sanitarios galegos comezan a mobilizarse ante a escaseza de material básico para equipos de protección individual (EPIS) co que afrontar o risco do coronavirus, que fai que algúns deles teña que traballar utilizando bolsas de plástico e batas de pintor. María Canedo, enfermeira do Sergas, activou xa unha petición na plataforma change.org para “poder atender aos pacientes en condicións de seguridade para os profesionais e tamén para o resto de pacientes”.

Así, denuncia que os protocolos cambian continuamente, “máis por problemas de non dispoñibilidade de material, que por base científica”. Os sanitarios insisten que “sen EPIS non hai protección para o profesional” e isto fai que eles mesmos acaben converténdose en pacientes, multiplicando o foco do contaxio.

“Isto é o que sucede hoxe no Chus, onde os profesionais piden material, e tentan apañarse co que poden / bolsas de plástico, batas plástico de pintor…..Terceiromundista!”, denuncia. Así, lembra que este é un “grave problema de saúde pública”. “Non teñen dereito a poñer en risco a nosa saúde, é máis, vostedes están obrigados a protexer a nosa saúde laboral”, indica.

Esta sanitaria, como xa manifestaron outros compañeiros en distintas cidades, aseguran que “hai cada vez máis compañeiros contaxiados” e acusan ás administración de non prevelo con anticipación porque xa pasaba noutros países. “Nun problema de saúde pública todos gañamos se facemos as cousas ben”, conclúe.