O alcalde de Vigo, Abel Caballero, denunciou este xoves o “absoluto descaro” da Xunta de Galicia, por anunciar, en vésperas dunhas eleccións autonómicas, varias actuacións na cidade, tras “11 anos sen facer nada”.

En declaracións remitidas aos medios, o rexedor olívico criticou que o goberno galego anuncie a licitación do proxecto para construír un Centro Integral de Saúde nun dos edificios dos actuais xulgados (que quedará baleiro cando se inaugure a nova Cidade da Xustiza).

A ese respecto, o alcalde non só lembrou que o inmoble segue albergando actividade xudicial, senón que vai seguir así “durante anos, porque a Cidade da Xustiza vai moi atrasada”. “Anuncian algo para despois de eleccións, e algo de dubidosa eficacia”, incidiu.

Con respecto á estación de autobuses da Avenida de Madrid, onde a Xunta anunciou que construirá un centro de día e unha escola infantil, Abel Caballero lembrou que a administración galega “non fixo nin un só centro de día, nin escola infantil nos últimos 11 anos”. “E a un mes das eleccións anuncian un para dentro de 4 ou 5 anos, porque aínda teñen que acabar a nova estación de autobuses (no complexo intermodal de Urzáiz)”, apostilou.

“No goberno de Vigo temos as ideas claras. Falaremos con quen gañe as eleccións para saber que se vai a facer nos xulgados (…) e que se fai na estación de autobuses, que é propiedade do Concello. Ten que ser algo dialogado”, proclamou o alcalde, quen cualificou os anuncios da Xunta como “unha tomadura de pelo colosal” á cidade, “sen credibilidade”.