O arquitecto municipal de Tui, Javier Antoñón, criticou este venres que a zona 0 da explosión de Paramos estase convertendo nun “circuíto turístico”.

Así llo trasladou á conselleira de Infraestruturas e Vivenda, Ethel Vázquez, ao alcalde de Tui, Carlos Vázquez Padín, e ao delegado da Xunta en Pontevedra, José Manuel Cores Tourís, durante unha xuntanza no centro de atención aos afectados pola traxedia con empresarios da construción.

Antoñón explicou que os peritos xudiciais expuxeron facer primeiro un estudo técnico e económico de cada vivenda, por tramos dentro da zona cero. “Entendo que é mellor manter o perímetro acoutado porque se está convertendo nun circuíto turístico e para evitar males maiores”, sinalou durante esa xuntanza. Ademais, apostou por empezar a reconstrución polas vivendas “máis facilmente recuperables”.

En canto aos inmobles con máis danos, nesa xuntanza, na que a Xunta animou aos construtores a reconstruír a zona 0, pediuse a participación de bombeiros para escoltar aos propietarios e que, con total garantía de seguridade, poidan acceder á zona a recuperar as súas zonas.