O Concello de Vigo iniciou este mércores a montaxe da gran nora do Nadal que se instalará na rúa Concepción Areal, á beira da Praza de Compostela, que terá 62 metros de altura e desde a que, segundo o alcalde, Abel Caballero, “se verá Nova York”.

O rexedor olívico supervisou o inicio da montaxe desta atracción, que obriga a restrinxir o tráfico nun tramo de Areal para facilitar a colocación das grandes pezas desta nora, na que poderán viaxar ata 192 persoas á vez.

Desde o alto da nora, chanceou o alcalde, poderá verse, por unha banda as rías de Vigo, Pontevedra e Arousa; por outro, a ponte de Rande e Redondela; e “cara ao Oeste, verase Nova York”.

Abel Caballero destacou que a instalación contará con case 200.000 luces led, e unha gran pantalla no seu centro onde se poderán ler mensaxes “como, por exemplo, dicirlle ao alcalde de Madrid que lles gañamos coas luces” ou que “Vigo é a cidade máis bonita do mundo”.

A nora comezará a funcionar o 24 de novembro, ao día seguinte do gran aceso da iluminación do Nadal, e estará operativa durante toda a campaña de Nadal, de 11 a 23 horas. O único que o rexedor non quixo desvelar é o prezo que haberá que pagar para subirse nela: “Iso é cousa do que a fai”.

O alcalde lembrou que esta nora, xunto co resto de atraccións do Nadal (iluminación, poboado de Nadal, mercadillo, etc.), atraerá a moitos máis visitantes que o ano pasado cando, segundo incidiu, dous millóns de persoas pasearon polo centro de Vigo nesas datas.