O alcalde de Vigo, Abel Caballero, proclamou este martes que acepta “o reto” do seu homólogo de Madrid, José Luís Martínez Almeida, de comparar a iluminación do Nadal de ambas as cidades: “A ver quen ten as mellores luces”.

Nunha rolda de prensa, o rexedor olívico apuntou que o alcalde de Madrid retouno, e engadiu que, polo momento, Vigo adiántase no aceso das luces (que se inaugura o 23 de novembro). “No tempo xa gañamos por goleada”, chanceou. “Veremos, cando acendan as luces, faremos a comparación. Pero como van ser mellores as de Vigo, eu convido a todo Madrid e a toda España a que veñan velas”, proclamou.

Abel Caballero explicou que este mesmo martes ponse en marcha o “reloxo da conta atrás” na fachada da Casa Galega da Cultura, que irá marcando o tempo que resta para o acto do aceso.

Segundo sinalou o rexedor olívico, todos os cidadáns, especialmente os máis novos, están a mostrar un “entusiasmo indescritible” coa iluminación do Nadal, e así o trasladou nunha entrevista emitida en Cataluña. “Xa lles dixen que ese día miren cara ao oeste verdadeiro e verán o resplandor”, afirmou.

“Ao alcalde de Nova York chamareino máis tarde para que mire cara ao leste verdadeiro”, engadiu Abel Caballero, quen apuntou que Vigo, Nova York e Barcelona, están “na mesma latitude”.