A cidade de Vigo será o escenario no que se estreará a campaña ‘Produto pesqueiro: rico, san e seguro’ do Ministerio de Agricultura, Pesca e Alimentación (MAPA), coincidindo coa feira de produtos do mar conxelados, Conxemar, que se celebrará a próxima semana no Instituto Feiral.

Dita campaña foi presentada este venres no Concello olívico, no marco dun encontro coas empresas do sector produtor e transformador de produtos do mar, no que participaron o director xeral de Industria Alimentaria, José Miguel Herrero; o director xeral de Ordenación Pesqueira e Acuicultura, Ignacio Gandaria; e o propio alcalde de Vigo, Abel Caballero.

Esta campaña promocional iniciarase coa celebración da Semana de Produto Pesqueiro en Vigo con talleres de cociña en distintas prazas da cidade, talleres de consumo responsable, actividades con nenos, e outras iniciativas, que culminarán o domingo 6 de outubro cunha gran degustación ao mediodía na Praza da Constitución.

Así mesmo, ademais dunha campaña institucional de publicidade en medios de comunicación, o ministerio tamén dará a coñecer esta acción promocional na caseta que terá na feira Conxemar, no que haberá ‘showcookings’ a cargo do cociñeiro Álvaro Porrero.