O coñecido como ‘rei dos xitanos de Galicia’, Sinaí Giménez, alegou este luns, antes de entrar nos xulgados en Pontevedra, que “non pegou a ninguén”. ” Sinaí Giménez non é ningún delincuente”, afirmou antes de entrar nos xulgados, onde foi citado por unha liorta cos coñecidos como ‘zamoranos’ no mercado de Cangas do Morrazo.
Sinaí Giménez, ao que acudiron a apoiar medio cento de xitanos, explicou que os feitos sucederon despois de que a súa nai denunciase ante a Fiscalía “unha compravenda de nenos roubados” e, “á semana, de forma organizada ocuparon tres metros do seu posto” e despois unha “represalia”. “Non teño disputas contra os zamoranos”, asegurou.
“Non sei por que tanta alteración, Sinaí Giménez non é ningún delincuente”, sinalou o propio procesado para engadir que “non ten antecedentes penais”. “Sinaí non pegou a ninguén”, dixo, para insistir en que acudirá a todos os seus xuízos “tranquilo, a defenderse como calquera cidadán español”.
“Péganlle á miña nai, eu vou levantala e non me deixan levantarme do chan, péganme catro golpes e alí quedei teso. Grazas á Garda Civil non estamos mortos”, relatou en relación ao sucedido en Cangas, que atribúe a que “foi organizado” porque os ‘zamoranos’ “sabían que só estabamos tres ou catro xitanos galegos”.
“Por que non o fan cando estamos case ao 50%?. Foi todo moi coordinado, por que non o fixeron en Redondela?, porque alí estamos ao 50% e no corpo a corpo non poden cos xitanos galegos“, abundou.
XUÍZO
Na vista deste luns falta de novo un acusado, Rafael F. G., polo que o tribunal ten que determinar se se celebra ou se apraza o xuízo sinalado para esta xornada, xa que os avogados solicitan que se leve a cabo con todos os procesados.
A Fiscalía pide penas que suman 35 anos de cárcere para 12 acusados de participar nunha liorta no mercado de Cangas, entre os que están Sinaí Giménez e varios dos seus familiares, así como membros do grupo coñecido como ‘zamoranos’, e que serán xulgados na sala do Penal 2 de Pontevedra, entre o 1 e o 5 de xullo.
O Ministerio Público formulou escrito de acusación contra 12 feirantes xitanos (sete deles do grupo coñecido como ‘zamoranos’, e outros cinco dos ‘ Morones’), aos que considera autores de diversos delitos de lesións, por unha pelexa que tivo lugar na mañá do 16 de outubro de 2015.
