En Marea, BNG e a Asociación para a Defensa da Sanidade Pública saíron nas últimas horas en defensa das reivindicacións do colectivo de auxiliares de enfermaría do Hospital Álvaro Cunqueiro no conflito que manteñen coa dirección.

Así, a deputada Eva Solla reuniuse coa comisión de centro para abordar esta problemática e reclamou que a empresa concesionaria “poña os medios de traballo para acabar coa sobrecarga de traballo que o persoal auxiliar de enfermaría está a sufrir”, así como que o Sergas retire os expedientes aos traballadores.

Neste marco, o grupo parlamentario de En Marea tamén avanzou que trasladará iniciativas ao pleno e á Comisión do Parlamento de Galicia “para tentar solucionar este novo atropelo, froito da privatización que a Xunta cometeu neste hospital”. “É un roubo máis á cidadanía, ter a profesionais sanitarios facendo un traballo que debería facer a empresa privada”, apostilou.

Pola súa banda, a responsable de sanidade do grupo parlamentario do BNG, Montse Prado, trasladou o apoio do Bloque durante a protesta deste xoves e remarcou que xa advertiu que “este chamado modelo público-privado, que non é máis que a privatización, ía ter consecuencias” como esta.

Así, criticou que o PP “deixou en mans da concesionaria moitos servizos, entre eles a limpeza e a lavandaría”, e agora, “lonxe de esixirlle ás que empresas, esixe ao seu persoal, xa sobrecargado e con cocientes insuficientes, a asunción desas funcións”.

Así mesmo, a Asociación Galega para a Defensa da Sanidade Pública considerou “inaceptable que a empresa concesionaria obrigue a persoal do Sergas a realizar unha actividade que debería realizar cos seus propios recursos”, e mantivo que é “incomprensible e escandaloso que a Xerencia se poña de parte da empresa privada e ameace aos seus propios traballadores”.

Neste contexto, volveu a reclamar que se devolva a xestión do Hospital Álvaro Cunqueiro ao sistema sanitario público “para evitar estes problemas e enfrontamentos, que se suman aos recortes de recursos e ao aparcadoiro”.

Tamén hai uns días o alcalde de Vigo, Abel Caballero, esixiu ao presidente da Xunta, Alberto Núñez Feijóo, “que tome decisións” sobre a situación de “catástrofe” do Hospital Álvaro Cunqueiro (HAC), e considerou que os auxiliares de enfermaría “fan ben” en non transportar as bolsas da roupa sucia até os puntos habilitados.