A Universidade de Vigo (UVigo) alcanzou unha taxa de ocupación do 103 % na matrícula de novo ingreso de grao, segundo confirmou a reitora, Carmen García Mateo, ao Consello de Goberno do centro. Tal como recolle o diario da universidade (DUVI), un curso máis a demanda de prazas de matrícula de novo ingreso superou a oferta, rexistrándose 3.883 matrículas fronte ás 3.754 prazas ofertadas nos tres campus. “Hai sobrematrícula nalgúns graos”, apuntou este luns García Mateo no seu informe, destacando a importancia de axustar a oferta á demanda.

É o campus de Pontevedra o que contabilizou unha maior taxa de ocupación, cun 106 % e 820 alumnos matriculados. Pola súa banda, Ourense quedou cun 103 % e 1.050 alumnos, mentres que Vigo alcanzou un 102 %, con 2.013 prazas ocupadas das 1.967 ofertadas. Ademais, en canto aos datos de máster, aínda que aínda falta un prazo de matrícula extraordinario, a ocupación supera xa o 86 % das prazas dispoñibles.