Flor Baena, irmá do vigués Xosé Humberto Baena, un dos últimos fusilados pola ditadura franquista en setembro de 1975, solicitou este luns por rexistro unha entrevista co alcalde de Vigo, Abel Caballero, a quen lle trasladará a petición de que o Concello organice unha homenaxe oficial ao seu irmán. Nun vídeo publicado nas redes sociais, Flor Baena lembra que o Concello de Oleiros, na Coruña, lle dedicou unha rúa ao seu irmán en 1985, coincidindo co décimo aniversario do que cualifica como “xuízo inxusto no que foi sometido a torturas e acusado dun crime que non cometera”.

A condena e o xuízo de Xosé Humberto Baena foron declarados nulos ao abeiro da Lei de Memoria Democrática e, no verán de 2025, o Ministerio remitiulle á familia a declaración oficial nese sentido. Posteriormente, en outubro de 2025, o Congreso dos Deputados organizou en Madrid un acto con familiares das persoas fusiladas e asasinadas polo franquismo. Así mesmo, o pasado mes de xuño, a Facultade de Historia da Universidade de Santiago de Compostela, onde estudou Humberto Baena, abriu o denominado ‘Espazo Baena’, no que se dá a coñecer o seu caso.

O Concello de Vigo tamén adoptou anteriormente medidas de recoñecemento. En 2005 aprobou, por proposta de Amnistía Internacional, unha declaración institucional contra a pena de morte na que se facía referencia ao caso dos dous vigueses fusilados en 1975, Xosé Humberto Baena e José Luis Sánchez Bravo. Ademais, o 1 de novembro de 2023, o Concello olívico instalou un panel informativo sobre o caso Baena no cemiterio de Pereiró, onde está soterrado. A familia reclama agora dar un paso máis e que Vigo organice unha homenaxe oficial na súa memoria. As normas internacionais de dereitos humanos sobre reparación ás vítimas establecen que, ademais dunha desculpa pública que recoñeza os feitos, é necesario render homenaxe e conmemorar as vítimas e as súas familias.