A Xunta, a través da Consellería de Sanidade, informou ao Concello de Vigo de que as últimas análises realizadas á auga das praias de Rodas e de Figueiras das Illas Cíes mostran que xa son aptas de novo para o baño. Todo iso despois de que o pasado venres o Goberno autonómico alertase dun “episodio puntual” de contaminación microbiolóxica na auga dos devanditos areais, desaconsellando o baño aos cidadáns.

“No marco da colaboración entre a Consellería de Sanidade e a Consellería de Medio Ambiente e Cambio Climático, e atendendo ao carácter excepcional da situación por tratarse dun parque natural, estableceuse un seguimento específico da contaminación detectada no Parque Nacional Marítimo-Terrestre das Illas Atlánticas de Galicia, realizándose novas análises de auga nas últimas horas, que indican xa valores normais de enterococos intestinais e de escherichia coli, polo que non supoñen un risco para a saúde dos bañistas”, subliña o Executivo galego.

Desta mañanera, engade, pódese levantar a recomendación de non bañarse, aínda que a Consellería continuará co seguimento habitual da evolución da calidade microbiolóxica da auga.