A tecnoloxía de vangarda abre novas vías para mellorar a calidade de vida dos pacientes máis novos. Un programa de investigación desenvolvido de forma conxunta polo grupo HealthyFit do Instituto de Investigación Galicia Sur (IISGS), a Universidade de Vigo (UVigo) e o Servizo de Pediatría do Hospital Álvaro Cunqueiro comprobou que os exercicios baseados en realidade virtual melloran notablemente a capacidade funcional e física de nenos e nenas en tratamento oncolóxico.

VIDEOXOGOS TERAPÉUTICOS SEN SAÍR DA CASA

Os resultados preliminares deste estudo —no que participaron once menores e adolescentes ao longo dos dous últimos anos— foron presentados polo profesor da Facultade de Fisioterapia Pablo Campo e a investigadora Pediátrica María Tallón. O proxecto consiste nun adestramento de oito semanas no que os pacientes realizan entre tres e seis sesións semanais de exercicio físico adaptado empregando lentes de realidade virtual e videoxogos seleccionados previamente pola súa compoñente motriz.

Esta iniciativa xurdiu a raíz dun estudo de caso previo en 2023 que demostrou a viabilidade de artellar programas de fisioterapia que os menores puidesen executar nos seus propios fogares sen necesidade de desprazamentos continuos. A medida que avanzaban as semanas, a intensidade e duración dos xogos incrementábase seguindo unhas pautas específicas, o que acabou por xerar melloras obxectivas na forza muscular, a autonomía funcional e a habilidade para realizar dúas tarefas de forma simultánea.

O RETO DE MINIMIZAR AS SECUELAS COA AXUDA DA DIVERSIÓN

A importancia deste tipo de terapias complementarias radica no novo escenario ao que se enfronta a medicina pediátrica. Segundo defendeu a investigadora María Tallón, o cancro infantil conta hoxe en día cunha elevada taxa de supervivencia en Galicia, que se sitúa no 84 %. Por mor disto, o desafío actual das autoridades sanitarias xa no é só salvar vidas, senón reducir as secuelas a longo prazo que a propia enfermidade ou os agresivos tratamentos acaban provocando no 60 % dos casos.

Alén dos datos clínicos, a valoración máis positiva chegou por parte dos propios nenos e nenas de entre 6 e 14 anos que participaron na proba. Os menores destacaron que o uso das lentes lles permitiu “sudar” e “facer deporte” dun xeito moi divertido, axudándolles a romper a rutina dos tratamentos e a desconectar do proceso hospitalario. Un éxito do que amosaron o seu orgullo tanto a xefa de Pediatría do Álvaro Cunqueiro como a responsable do IISGS, Eva Poveda, quen agradeceron a implicación absoluta das familias para sacar adiante o proxecto.