O conselleiro de Cultura, Lingua e Xuventude, José López Campos, e a conselleira do Mar, Marta Villaverde, participaron este xoves na inauguración da pintura mural no espigón de A Doca, no municipio de Baiona. A obra, realizada pola recoñecida artista Lula Goce, foi posta como exemplo por parte da Xunta de Galicia de “promoción da arte en espazos públicos” para “fomentar a dinamización e a participación cultural”.

Deste xeito, o titular de Cultura do Goberno galego salientou que estas intervencións artísticas “non só embelecen os contornos urbanos, senón que revitalizan cultural e socialmente”. Nesa liña, López Campos puxo en valor a arte urbana como “base da transformación” dos municipios, ao promover “a cohesión social, favorecer o diálogo comunitario e favorecer unha participación cidadá activa e comprometida”. Ao fío diso, celebrou estas propostas nas que a arte sae á rúa e propicia o achegamento de distintos públicos, un obxectivo que, segundo apuntou, está na base da Lei de Cultura inclusiva e accesible de Galicia.

MELLORAS NO MUELLE

Pola súa banda, a conselleira do Mar destacou que esta pintura mural de Lula Goce sitúase nun espazo que “forma parte da vida cotiá da veciñanza de Baiona, un lugar de encontro, de paseo, de conversa e de goce á beira do mar”.

Ademais, Villaverde sinalou que a intervención supón o “culme” da inversión de 330.000 euros realizada para mellorar este peirao. Con este investimento preténdese “convertelo nun punto de referencia cultural e turístico, promovendo o coñecemento da tradición pesqueira e a conservación do entorno mariño”. A actuación de remodelación é froito dun convenio de colaboración entre o organismo público Portos de Galicia, o Concello de Baiona e a Fundación Sabadell.