Os grupos municipais de PP e BNG no Concello de Vigo rexistraron este luns a solicitude de convocatoria dun pleno extraordinario para reclamar ao goberno de Abel Caballero e ao propio alcalde que dea explicacións tras a imputación da súa concelleira de Seguridade, Patricia Rodríguez, por un suposto delito de homicidio imprudente, tras o accidente mortal da atracción Saltamontes durante as festas de Matamá en agosto de 2024.
A convocatoria recolle un único punto na orde do día: a comparecencia do alcalde, Abel Caballero, para informar as actuacións municipais relacionadas con ese accidente e tamén coa investigación xudicial, que acabou coa imputación de Patricia Rodríguez e do dono da atracción por un posible delito de homicidio imprudente e por un de lesións por imprudencia. Así mesmo, o texto recolle varias propostas de acordo, entre as que destacan o cesamento inmediato de Patricia Rodríguez, a creación dunha comisión de investigación e que a Corporación traslade as condolencias ás familias do novo falecido, Iván C.H.
Tal e como recolle o regulamento do Pleno, a convocatoria deste pleno extraordinario debe realizarse dentro do catro días seguintes á petición realizada pola oposición, e a súa celebración “non se demorará máis de quince días hábiles desde que o escrito tivese entrada no Rexistro do Pleno”. Se o alcalde non convoca o pleno nese prazo, a sesión queda sinalada de forma automática para as 12.00 horas do décimo día hábil seguinte á finalización do devandito prazo.
Na motivación da solicitude do pleno, PP e BNG advirten de que a permanencia no goberno local dunha persoa imputada por delitos tan graves é “insustentable” e “dana gravemente” o prestixio da institución municipal. Igualmente, a oposición incide en que a decisión do alcalde de mantela no cargo, ou a “falta de explicacións públicas” e o rexeitamento a crear unha comisión de investigación, “resultan de todo inaceptables”.
