Decenas de persoas protestaron este martes en Vigo pola “situación crítica” que vive a xustiza ante o “fracaso” na implantación da “mal chamada lei de eficiencia administrativa”. Convocados por Alternativas na Xustiza, profesionais do sector concentráronse ante a Cidade da Xustiza da cidade olívica tras unha pancarta que rezaba ‘Sen xustiza non hai dereitos. Defendámola’, reivindicando a necesidade de máis medios persoais e materiais.
“Non hai eficiencia sen un aumento real do persoal”, subliñaron nun manifesto, criticando a “sobrecarga de traballo inasumible” que viven cada día tras a chegada da nova lei. A pesar de recoñecer que esta nova lexislación xa “non se pode parar”, marcáronse como obxectivo conseguir máis medios para poder sacar o traballo adiante, ante unha situación de “caos” que sofren.
Por iso, solicitaron unha mesa sectorial para negociar coas administracións pertinentes a forma de reverter este problema, xa que, ao seu xuízo, están a aforrar soldos, “permitindo que as oficinas xudiciais colapsen”. “Aforro á conta da saúde laboral”, insistiron, asegurando que o Ministerio e as comunidades con competencias manteñen desde hai meses sen cubrir prazas vacantes que teñen que asumir o resto de compañeiros.
