Esquerda Unida presentou este martes no rexistro do Concello de Vigo unha proposta de intervención para mellorar a seguridade viaria na contorna do Mercado das Travesas, nunha área delimitada polos pasos de peóns de Camiño de Espedrigada, Luís Seoane e a Avenida da Florida. En concreto, a formación pide que se dea prioridade aos peóns en toda a zona, con sinalización específica e a creación dun espazo que obrigue aos vehículos a reducir a velocidade. Entre as medidas propostas inclúese a instalación dun pavimento diferenciado mediante lastros e elevado, co obxectivo de aumentar a seguridade das persoas que transitan pola área.

Ademais, Esquerda Unida solicita que o Concello valore cambios na regulación do tráfico na Avenida da Florida para evitar que os vehículos poidan incorporarse ao Camiño de Espedrigada ao mesmo tempo desde ambos sentidos da vía, unha situación que consideran potencialmente perigosa. A proposta busca transformar este espazo nunha contorna máis segura e accesible, reducindo riscos nunha zona con alta presenza peonil debido á actividade comercial e á proximidade do mercado.