O alcalde de Vigo, Abel Caballero, sinalou este martes que o presidente da Xunta, Alfonso Rueda, “como Saulo, xa caeu do cabalo e xa viu o mundo”, ao recoñecer que a conexión de alta velocidade entre Vigo e O Porto non estará lista até o ano 2038, aínda que atribuíu este atraso ao Goberno de Portugal.
En declaracións remitidas aos medios, o rexedor olívico insistiu en que “esa conexión non vai estar antes do 2038” e asegurou que o motivo principal é que Portugal “non chega a tempo e á mesma velocidade que o pode facer España”. Pola súa banda, a Xunta vén atribuíndo o incremento dos prazos aos atrasos nos tramos españois, como a saída sur ferroviaria e o trazado entre O Porriño e a fronteira portuguesa.
Caballero afirmou que leva anos advertindo desta situación: “Díxenllo durante anos: Portugal non dá a velocidade que ten que dar”, criticando que Rueda regresase de reunións con responsables lusos mantendo a previsión do 2030. “Todos sabiamos que era unha mentira, unha barbaridade pretender o imposible”, proclamou.
O alcalde asegurou que “entende” a posición portuguesa, xa que a súa prioridade actual é o eixo ferroviario O Porto-Lisboa, lembrando que o país veciño “non ten nin un só quilómetro de Alta Velocidade”. Con todo, defendeu que o Goberno central está a cumprir cos compromisos no lado español da fronteira.
Segundo explicou, a saída sur ferroviaria de Vigo “vai en tempo e forma” e o estudo informativo atópase “próximo a rematar”, cun horizonte que situou arredor do mes de novembro deste ano. Ademais, indicou que tamén está en marcha o estudo do tramo entre O Porriño e o río Miño, aínda que recoñeceu que existe un obstáculo clave: “non está acordado cal é o punto de encontro” entre ambos países.
Caballero concluíu defendendo que o Goberno de España “está a responder aos prazos que deu” e que continúa avanzando nos estudos técnicos necesarios para unha infraestrutura estratéxica que, segundo reiterou, seguirá condicionada polos ritmos de Portugal.
EIXO ATLÁNTICO
Pola súa banda, o Eixo Atlántico solicitou ao presidente da Xunta, Alfonso Rueda, que faga público “con urxencia” o estudo “no que se basea para afirmar que a liña ferroviaria O Porto-Vigo atrasarase até 2038“. Faio nun comunicado despois de que, tras o Consello deste luns, se insitiese por parte do Goberno galego en que se demorará até ese ano por “atrasos” nos tramos do Saída Sur de Vigo e entre O Porriño e a fronteira lusa.
Segundo o Eixo Atlántico, “estes datos non coinciden en absoluto cos da entidade e constitúen unha afirmación que, de non ser certa, sería perigosa e irresponsable”. Para Xoán Vázquez Mao, secretario xeral do Eixo Atlántico, “é inaceptable” lanzar “datas alarmistas sen facer público ningún estudo que as apoie”, asegura despois dun informe avaliado pola Xunta o luns e no que se recolle que só no que se refire ao Saída Sur de Vigo a publicación do estudo informativo ampliouse dous anos sobre o prazo contraactual inicial.
“Queremos coñecer os datos reais porque pode xerar desánimo e confusión entre a cidadanía”, sostén o secretario xeral do Eixo Atlántico. Ademais, indica que, segundo os datos do Eixo Atlántico, “o único desfasamento real está vinculado ao estudo informativo previo do Saída Sur de Vigo e á reedificación do trazado da estación de Vila Nova de Gaia”.
