O alcalde de Vigo, Abel Caballero, asegurou que a cidade acolleu este ano ata 42 rodaxes, consolidándose, segundo dixo, “como un estudo” e pondo en valor a importancia que teñen para a economía da urbe. Nun audio enviado aos medios de comunicación, o rexedor destacou que na actualidade Atresmedia está a rodar desde hai semanas a serie Ágata y Lola, que durará varios meses máis.

Isto suporá, tal como subliñou Caballero, a contratación de persoal local, incentivando a economía da cidade e creando emprego. Segundo as súas cifras, Vigo acolleu ata 42 rodaxes este ano, cunha película, catro series, sete programas de televisión e sete documentais, dous curtos, dous videoclips, seis anuncios e 13 prácticas audiovisuais.